धाराशिव : शिवसेनेतून बंड करून सहा खासदारांनी एकनाथ शिंदे यांच्या नेतृत्वाखाली काम करण्याचे ठरवले.

फुटीर खासदारांमध्ये सर्वाधिक चर्चा होते आहे ती ओमराजे निंबाळकर यांची. उद्धव ठाकरे यांनी आज धाराशिवला जाऊन तेथील मतदारांची माफी मागितली. या नालायकाला तिकीट दिले नसते तर गद्दारीची कीड वाढली नसती, असे ठाकरे म्हणाले. तसेच गद्दारांवर आगपाखड करणारा ओमराजे स्वतःचा भाव वाढवून अखेरच्या क्षणी विकला, असा हल्ला उद्धव ठाकरे यांनी चढवला.

बंडखोर खासदारांच्या मतदारसंघात जाऊन उद्धव ठाकरे सभा घेत आहे. आज त्यांनी धाराशिवमध्ये ओमराजे निंबाळकर यांच्या बंडखोरीच्या पार्श्वभूमीवर सभा घेतली. सहा खासदार सोडून गेले पण त्यांना सर्वाधिक दुःख ओमराजे निंबाळकर यांच्या सोडून जाण्याचे झाल्याचे त्यांच्या भाषणातून जाणवले, ओमला मी शेवटपर्यंत जपण्याचा प्रयत्न केला पण तो अखेरच्या क्षणी विकला गेला. तो माणूस म्हणायच्या देखील लायकीचा नाही, असा घणाघात उद्धव ठाकरे यांनी केला.

हरामाचा पैसा हवा होता म्हणून गद्दार तिकडे गेला. त्याला उमेदवारी दिली याची मला लाज वाटते. शिवसैनिकांनी मला माफ करावं. ओमराजेला उमेदवारी दिली नसती तर गद्दारीची कीड वाढली नसती. सरकारला भ्रष्टाचारात मदत करायला हा गद्दार तिकडे गेला. ओमराजे, आता कपाळावरील गहारीचा शिक्का कसा पुसणार? असा सवाल उद्धव ठाकरे यांनी विचारला,

तेव्हाच माझ्या मनात शंकेची पाल चुकचुकली....

बैठकीत ओमचा चेहरा साफ नव्हता, त्याचवेळी मनात शंकेची पाल चुकचुकली. ओमराजेचा व्हिडीओ पाहिला आणि त्याला फोन केला, तुझ्यावर काही दबाव आहे का, तणाव आहे का? त्यावर तो म्हणे, नाही अजिबात दबाव-तणाव नाही. पण माझ्या मनात तेव्हाच शंका आली, म्हटलं याचा चेहरा साफ दिसत नाही. ओमला मी शेवटपर्यंत जपायचा प्रयत्न केला. वरूण सरदेसाई आणि कैलास पाटील यांना भेटायला त्याला पाठवलं. मला ओमराजे पाहिजे, त्यांना खासदार पाहिजे, असे मी ओमराजेला म्हटले. पण आता लक्षात येतंय हा माणूस म्हणायचा देखील लायकीचा नाही, याच्या एवढ्या भानगडी आहेत. पाच जणांचं आधीच ठरलेले, ओमराजे शेवटपर्यंत अडून बसले, भाव वाढवून घेतला, असे शाब्दिक हल्ले उद्धव ठाकरे यांनी ओमराजेंवर चढवले. आता गद्दारीला माफी नाही. कितीही गद्दारी करा, तुमच्या छाताडावर भगवा फडकावल्याशिवाय राहणार नाही. मला धाराशिवची चिंता नाही. इथे आमदारही आपलेच आणि पुढचा खासदारही आपलाच येणार हे मला माहिती आहे, असा विश्वास उद्धव ठाकरे यांनी व्यक्त केला.