मुंबई : गोरेगाव येथील फिल्मसिटी परिसरात प्राइम फोकस समूहाच्या अत्याधुनिक जागतिक दर्जाच्या स्टुडिओच्या पहिल्या टप्प्याचे उद्घाटन मुख्यमंत्री देवेंद्र फडणवीस यांच्या हस्ते झाले. यावेळी त्यांनी सांगितले की, भारताला सर्जनशील अर्थव्यवस्थेचे (क्रिएटर इकॉनॉमी) जागतिक केंद्र बनविण्याचे पंतप्रधान नरेंद्र मोदी यांचे स्वप्न साकार करण्यासाठी अत्याधुनिक तंत्रज्ञान आणि जागतिक दर्जाच्या पायाभूत सुविधांची आवश्यकता आहे. प्राइम फोकसचा हा स्टुडिओ त्या दिशेने महत्त्वाचे पाऊल असून, त्यामुळे मुंबई जागतिक सर्जनशील उद्योगांचे प्रमुख केंद्र म्हणून अधिक सक्षम होईल.

मुख्यमंत्री फडणवीस म्हणाले की, जगभरातील मनोरंजन आणि सर्जनशील उद्योगांना सेवा देण्याच्या उद्देशाने उभारण्यात आलेली ही सुविधा महाराष्ट्रासाठी अभिमानाची बाब आहे. 'वेव्ह्स 2025' परिषदेदरम्यान झालेल्या सामंजस्य करारानंतर अवघ्या एका वर्षात या प्रकल्पाचा पहिला टप्पा पूर्ण झाला असून, शासनाने यासाठी आवश्यक ते सर्व सहकार्य केले आहे.

भारतीय संस्कृती, परंपरा आणि इतिहासामध्ये असंख्य प्रेरणादायी कथा दडल्या असून, त्या जागतिक स्तरावर पोहोचविण्यासाठी आधुनिक तंत्रज्ञान आणि सक्षम सर्जनशील परिसंस्था आवश्यक असल्याचेही त्यांनी नमूद केले. प्राइम फोकसची ही सुविधा भारताच्या सर्जनशील क्षमतेला जागतिक व्यासपीठ उपलब्ध करून देईल, असा विश्वास त्यांनी व्यक्त केला.

यावेळी इलेक्ट्रॉनिक्स, माहिती तंत्रज्ञान, कृत्रिम बुद्धिमत्ता आणि सांस्कृतिक कार्य मंत्री आशिष शेलार यांनी प्रकल्पाचे कौतुक करत संस्कृती आणि अत्याधुनिक तंत्रज्ञानाचा प्रभावी संगम या स्टुडिओच्या माध्यमातून साकार झाल्याचे सांगितले. प्रधानमंत्री नरेंद्र मोदी यांच्या 'ऑरेंज इकॉनॉमी' संकल्पनेला प्रत्यक्ष आकार देण्याचे काम प्राइम फोकसने केले असून, सर्जनशीलता, सांस्कृतिक समृद्धी आणि आधुनिक तंत्रज्ञानाची सांगड घालणारा हा उपक्रम देशासाठी नवे मानदंड निर्माण करेल, असे ते म्हणाले.

उद्घाटन समारंभाला केंद्रीय माहिती व प्रसारण विभागाचे सचिव चंचल कुमार, सांस्कृतिक कार्य विभागाचे सचिव डॉ. किरण कुलकर्णी, दादासाहेब फाळके चित्रपट नगरीच्या व्यवस्थापकीय संचालक स्वाती म्हसे-पाटील तसेच प्राइम फोकस समूहाचे पदाधिकारी उपस्थित होते.

मुख्यमंत्री फडणवीस यांनी जगातील सर्वात मोठ्या चित्रपट सहनिर्मिती प्रकल्पांपैकी एक असलेल्या 'रामायण' चित्रपटाची निर्मिती या स्टुडिओमध्ये होत असल्याचा विशेष उल्लेख केला. भारतीय सर्जनशीलतेचा जागतिक स्तरावरील उत्कृष्ट नमुना म्हणून हा चित्रपट ओळखला जाईल, असा विश्वास त्यांनी व्यक्त केला.

युवा पिढीच्या सर्जनशील क्षमतेला प्रोत्साहन देणे, मनोरंजन उद्योगात रोजगाराच्या नव्या संधी निर्माण करणे आणि फिल्मसिटीचे जागतिक दर्जाच्या सर्जनशील व मनोरंजन केंद्रामध्ये रूपांतर करण्यासाठी राज्य शासन कटिबद्ध असल्याचे मुख्यमंत्री म्हणाले. या उद्देशाने फिल्मसिटीच्या व्यापक पुनर्विकासाचा आराखडाही लवकरच पूर्ण करण्यात येणार असल्याची माहिती त्यांनी दिली.