एमएमआरडीए आणि सिंगापूरच्या सुरबाना ज्युरोंग, मॅपलट्रीसोबत सामंजस्य करार

मुंबई : मुंबई महानगर प्रदेश (एमएमआर) आणि त्यापलीकडील परिसर हा देशाच्या आर्थिक विकासाचे प्रमुख केंद्र बनण्याची मोठी क्षमता असलेला प्रदेश आहे. नीती आयोगाने मुंबई महानगर प्रदेशाच्या विकासातून सुमारे १.५ ट्रिलियन डॉलरची अर्थव्यवस्था निर्माण करण्याची क्षमता व्यक्त केली आहे. या क्षमतेचा प्रभावी उपयोग करून मुंबई महानगर प्रदेशाचा नियोजित, शाश्वत आणि जागतिक दर्जाचा विकास करण्यासाठी राज्य शासनाने आंतरराष्ट्रीय संस्थांसोबत भागीदारी करण्यास सुरुवात केली आहे. या आंतरराष्ट्रीय भागीदारीमुळे ‘तिसऱ्या मुंबई’च्या विकासाला अधिक गती मिळेल, असा विश्वास मुख्यमंत्री देवेंद्र फडणवीस यांनी व्यक्त केला.

सह्याद्री अतिथिगृह येथे मुख्यमंत्री देवेंद्र फडणवीस यांच्या प्रमुख उपस्थितीत एमएमआरडीए आणि सिंगापूरमधील टेमासेक, सुरबाना ज्युरोंग आणि मॅपलट्री यांच्यात सामंजस्य करार करण्यात आले. यावेळी मुख्यमंत्री बोलत होते.

मुख्यमंत्री फडणवीस म्हणाले की, नवी मुंबई आंतरराष्ट्रीय विमानतळ तसेच मुंबई महानगर प्रदेशातील विविध पायाभूत सुविधा प्रकल्पांमुळे रायगड परिसराच्या विकासाला मोठी चालना मिळत आहे. या पार्श्वभूमीवर रायगड-पेण ग्रोथ सेंटर आणि ‘वर्ल्ड मुंबई’ अर्थात मुंबई 3.0 च्या विकासासाठी सिंगापूरमधील नामांकित संस्था आणि आंतरराष्ट्रीय गुंतवणूकदारांसोबत करण्यात आलेले हे करार महत्त्वपूर्ण ठरणार आहेत.

मुंबई महानगर प्रदेशाच्या विकासासाठी शासनाने आखलेले नियोजन आता प्रत्यक्षात येत आहे. पायाभूत सुविधांच्या विकासाची कामे वेगाने सुरू असल्याने देश-विदेशातील गुंतवणूकदारांचा महाराष्ट्रावरील विश्वास वाढत आहे. सिंगापूरला शहरी नियोजन, पायाभूत सुविधा आणि जागतिक दर्जाची शहरे विकसित करण्याचा मोठा अनुभव आहे. या अनुभवाचा लाभ महाराष्ट्राच्या विकासासाठी करून घेण्यात येणार असल्याचे त्यांनी सांगितले.

रायगड-पेणमध्ये १०० एकरांचा विकास प्रकल्प

रायगड-पेण ग्रोथ सेंटर लिमिटेड आणि मॅपलट्री यांच्यात १०० एकरांच्या मिश्र-वापर विकास प्रकल्पासाठी सामंजस्य करार करण्यात आला आहे. या प्रकल्पासाठी मॅपलट्रीकडून आवश्यक भांडवली आणि कार्यकारी भांडवलाची गुंतवणूक करण्यात येणार आहे. तसेच मूल्यनिर्मिती आणि देश-विदेशातील गुंतवणूकदार तसेच जागतिक कंपन्यांना आकर्षित करण्यासाठी प्रयत्न केले जाणार आहेत.

या भागीदारीमुळे रायगड-पेण ग्रोथ सेंटरमध्ये मोठ्या प्रमाणावर परकीय गुंतवणूक आकर्षित होण्याची अपेक्षा आहे. त्यामुळे परिसरातील औद्योगिक, व्यावसायिक आणि नागरी विकासाला मोठी चालना मिळणार आहे.

सुरबाना ज्युरोंगकडे प्रकल्प व्यवस्थापनाची जबाबदारी

रायगड-पेण ग्रोथ सेंटर लिमिटेडने सुरबाना ज्युरोंग यांची प्रकल्प व्यवस्थापन सल्लागार म्हणून नियुक्ती करण्यासाठी करार केला आहे. सुरबाना ज्युरोंगने यापूर्वीच रायगड-पेण ग्रोथ सेंटरसाठी व्हिजन प्लॅन, मास्टर प्लॅन आणि इन्फ्रास्ट्रक्चर प्लॅन तयार केला आहे.

प्रकल्पाच्या अंमलबजावणीच्या टप्प्यात सुरबाना ज्युरोंगचा अनुभव महत्त्वपूर्ण ठरणार आहे. कंत्राटदारांकडून करण्यात येणाऱ्या कामांचे परीक्षण व मंजुरी, डिझाईन, अभियांत्रिकी आराखडे, रेखाचित्रे, कागदपत्रे आणि इतर संबंधित कामांचे परीक्षण करण्याची जबाबदारी सुरबाना ज्युरोंग पार पाडणार आहे.

या आंतरराष्ट्रीय भागीदारीमुळे रायगड-पेण परिसराचा नियोजित विकास, गुंतवणुकीला चालना आणि ‘मुंबई 3.0’च्या संकल्पनेला जागतिक दर्जाचे स्वरूप देण्याच्या प्रयत्नांना बळ मिळण्याची अपेक्षा आहे.